Persbericht

Finale en finalisten Liet 2005

De haadsjuery fan Liet 2005, besteande út Else van der Greft, Sjouke Nauta en Beart Oosterhaven, hat út 32 ynstjoerings 10 'acts' en lietsjes keazen foar de finale fan it festival op sneontejûn 15 oktober yn stedsskouboarch De Harmonie te Ljouwert. It binne:

Om 'e Noard mei 'Frou yn it ljocht' (tekst: Wim Beckers; muzyk: Wim Beckers en Saskia Zoet);
Uilke Duinstra + groep: 'Nij begjin' (t + m: Uilke Duinstra)
CrazyBrainConnection: 'Dieuwke' (t: Jouke Hylkema; m: Rob van Hintum)
Mjitsk: 'Lânskip' (t: Youvan Mansveld en Wendy Schreurs; m: Youvan Mansveld, Wendy Schreurs en Henk de Jong)
Sieberein Schaaf: 'Werom by dy' (t: Willem Schoorstra; m: Sieberein Schaaf)
Multigrade Motoroil: 'Frijheid is lyk oan macht' (t + m: Hille Engelsma)
Donna Wouda en de Harelama Show: 'Mata Hari' (t: Arjan Hut; m: Jaap van der Meer)
Van Wieren: 'Nim dyn tiid' (t: Robbie van Wieren; m: Harry van Wieren)
Renske & Jochum: 'Jeanette' (t + m: Jouke Douwe de Vries)
Xigatze: 'Elektroanikafanke' (t + m: Gerben Gerbrandy).

Foar ynstjoerders fan lietsjes dy't net selektearre binne foar de finale, is der gelegenheid om 'ferhaal te heljen' op freed 7 oktober, de jûns fan 20.00 oere oant 22.00 oere op telefoannûmer: 0517 - 34 17 53.

Live op tv en televoting

De finale fan Liet 2005, de fyftjinde edysje, wurdt 'live' útstjoerd troch Omrop Fryslân televyzje. Om dy reden wurdt fan 't jier foar it earst wurke mei it útbringen fan stimmen fia de (mobile) telefoan, oftewol 'televoting'. De televyzjesjoggers en it publyk yn 'e Harmonie (dat no dus it mobyltsje meinimme moat, want de eardere Publykspriis is ôfskaft) bepale mei har stimmen foar 50% de útslach. De oare 50% wurdt útmakke troch in achtkoppige faksjuery.

Tekstpriis

Om te stimulearjen dat der flyt dien wurdt op 'e lietteksten, hat it bestjoer fan Stichting Liet 91 besletten om in aparte Tekstpriis yn te stellen. Oan dy priis is de namme ferbûn fan útjouwer en auteur Steven Sterk. De tekstpriis hat in eigen sjuery en wurdt op Liet 2005 foar de earste kear takend.